ചൊവ്വാഴ്ച 06 ജൂൺ 2023 - 4:34:36 am
Thu 25-05-2023 22:14 PM
ദുബായ്, 2023 മെയ് 25, (WAM) -- ദുബായ് ഫസ്റ്റ് ഡെപ്യൂട്ടി ഭരണാധികാരിയും യുഎഇ ഉപപ്രധാനമന്ത്രിയും ധനകാര്യ മന്ത്രിയുമായ ശൈഖ് മക്തൂം ബിൻ മുഹമ്മദ് ബിൻ റാഷിദ് അൽ മക്തൂം ലോകത്തെ പ്രമുഖ ഡിജിറ്റൽ ഇൻഫ്രാസ്ട്രക്ചർ കമ്പനികളിലൊന്നായ ഇക്വിനിക്സിന്റെ പ്രസിഡന്റും സിഇഒയുമായ ചാൾസ് മേയേഴ്‌സുമായി ഇന്ന് കൂടിക്കാഴ്ച നടത്തി.
പ്രമുഖ ആഗോള ടെക്‌നോളജി കമ്പനികളുമായുള്ള സഹകരണം ശക്തിപ്പെടുത്താനുള്ള ദുബായിയുടെ താൽപര്യം യോഗത്തിൽ മക്തൂം ബിൻ മുഹമ്മദ് എടുത്തുപറഞ്ഞു. പ്രമുഖ വ്യവസായികളുമായുള്ള വിജയകരമായ പങ്കാളിത്തം ദുബായിയുടെ ഡിജിറ്റൽ പരിവർത്തന യാത്രയ്ക്കും ആഗോള സാങ്കേതിക കേന്ദ്രമായി വികസിപ്പിക്കുന്നതിനും ഒരു പ്രധാന സഹായിയാണെന്ന് അദ്ദേഹം പറഞ്ഞു.
സമൂഹത്തെ കൂടുതൽ ഫലപ്രദമായി സേവിക്കുകയും സുസ്ഥിര വികസനം മെച്ചപ്പെടുത്തുകയുമാണ് ദുബായിയുടെ ഡിജിറ്റൽ പരിവർത്തന പദ്ധതിയുടെ പ്രധാന ലക്ഷ്യങ്ങളെന്നും അദ്ദേഹം പറഞ്ഞു.
സുപ്രധാന മേഖലകളുടെ കാര്യക്ഷമത വർദ്ധിപ്പിക്കുന്നതിനും ലോകത്തെ മികച്ച നഗര സമ്പദ്‌വ്യവസ്ഥകളിലൊന്നായി മാറുക എന്ന ദുബായിയുടെ തന്ത്രപരമായ ലക്ഷ്യം മുന്നോട്ട് കൊണ്ടുപോകുന്നതിനുമാണ് ഈ സംരംഭം ശ്രമിക്കുന്നത്, അദ്ദേഹം കൂട്ടിച്ചേർത്തു.
1998-ൽ സിലിക്കൺ വാലിയിൽ സ്ഥാപിതമായ ഇക്വിനിക്‌സ് ലോകത്തിലെ പ്രമുഖ ഡിജിറ്റൽ ഇൻഫ്രാസ്ട്രക്ചർ കമ്പനികളിലൊന്നാണ്. 37 രാജ്യങ്ങളിലായി സ്ഥിതി ചെയ്യുന്ന 198 ഡാറ്റാ സെന്ററുകളിലൂടെ പൊതു, സാമ്പത്തിക, വ്യാവസായിക, ആരോഗ്യ സംരക്ഷണം, റീട്ടെയിൽ, വിദ്യാഭ്യാസം, ഗതാഗതം എന്നിവയുൾപ്പെടെയുള്ള വിവിധ മേഖലകൾക്ക് ഇത് സേവനം നൽകുന്നു, കൂടാതെ വികസനത്തിലിരിക്കുന്ന 50 അധിക കേന്ദ്രങ്ങളും. 2022-ൽ, കമ്പനിയുടെ വരുമാനം 7.263 ബില്യൺ ഡോളറിലെത്തി, 2023-ലെ വരുമാനം 2 ബില്യൺ ഡോളറായിരുന്നു.
ഇക്വിനിക്സിന്റെ ഏറ്റവും വലിയ ഡാറ്റാ സെന്ററുകളിലൊന്നായ DX1 ദുബായ് ഡാറ്റാ സെന്റർ, ദുബായ് പ്രൊഡക്ഷൻ സിറ്റിയിലാണ് സ്ഥിതി ചെയ്യുന്നത്. 41,000 ചതുരശ്ര അടി വിസ്തൃതിയിലാണ് ഈ സൗകര്യം.
യോഗത്തിൽ ദുബായ് എക്‌സിക്യൂട്ടീവ് കൗൺസിൽ സെക്രട്ടറി ജനറൽ അബ്ദുല്ല അൽ ബസ്തി; ദുബായ് ഇക്കണോമി ആൻഡ് ടൂറിസം വകുപ്പ് ഡയറക്ടർ ജനറൽ ഹെലാൽ അൽ മർറി, ; ഡിജിറ്റൽ ദുബായ് ഡയറക്ടർ ജനറൽ ഹമദ് ഉബൈദ് അൽ മൻസൂരി; ദുബായ് ഡെവലപ്‌മെന്റ് അതോറിറ്റി ഡയറക്ടർ ജനറൽ മാലെക് അൽ മാലെക് എന്നിവർ പങ്കെടുത്തു.
WAM/അമൃത രാധാകൃഷ്ണൻ
