بدھ 01 فروری 2023 - 7:21:38 صبح

صدر عزت مآب شیخ محمد کا2023 کو پائیداری کا سال قراردینے کااعلان


ابوظہبی، 20 جنوری، 2023 (وام) ۔۔ صدر عزت مآب شیخ محمد بن زاید آل نھیان نے 2023 کو "پائیداری کا سال" قرار دینے کا اعلان کیا ہے۔

"پائیداری کے سال" میں متعدد اقدامات، سرگرمیاں اور ایونٹس کا انعقاد کیا جائے گا جو یواے ای کی پائیداری کی گہری اقدار اور اس کے بانی مرحوم شیخ زاید بن سلطان آل نھیان کی میراث پر مبنی ہیں۔ ملک کی قومی حکمت عملی کے مطابق، اس سے پائیدار طرز عمل کے لیے ملک گیر عزم کے ذریعے اجتماعی عمل کی حوصلہ افزائی کرتے ہوئے ماحولیاتی پائیداری پر بھی توجہ مرکوز کی جائے گی، جو متحدہ عرب امارات کو ایک خوشحال مستقبل کی جانب کام کرنے کے لیے اسے گھر سمجھنے والے ہر فرد کو متحد کرے گا۔

پائیداری سال کا مقصد توانائی، موسمیاتی تبدیلی اور پائیداری سے متعلق دیگر اہم مسائل جیسے چیلنجز کے اختراعی حل تلاش کرنے میں عالمی تعاون کو فروغ دینے کے لیے متحدہ عرب امارات کے عزم کا اظہار بھی ہے۔

سال بھر کے اقدامات کی نگرانی نائب وزیراعظم اور صدارتی عدالت کے وزیر عزت مآب شیخ منصور بن زاید آل نھیان اور عزت مآب شیخہ مریم بنت محمد بن زاید آل نھیان کریں گے۔

صدر عزت مآب شیخ محمد بن زاید نے کہاکہ متحدہ عرب امارات میں اتحاد کے بعد سے پائیداری ایک بنیادی اصول رہا ہے۔ قوم ماحولیاتی تحفظ اور وسائل کے انتظام کے لیے ایک غیر معمولی ماڈل کے طور پر خدمات انجام دے رہی ہے۔ مرحوم شیخ زاید ماحولیاتی اور آب و ہوا سے متعلق کوششوں کے عالمی رہنما تھے، انہوں نے اپنے پیچھے ایک میراث چھوڑی جس کی پیروی ہم آج بھی جاری رکھے ہوئے ہیں۔

عزت مآب نے مزید کہاکہ آج کا دن یو اے ای کے نقطہ نظر اور پائیداری کے لیے عزم اور مستقبل کے تحفظ کے لیے اس کی ذمہ داری کو ظاہر کرتا ہے۔ آج سے کام کرنے، کوششیں اور اقدامات شروع کرنے سے، ہم اس بات کو یقینی بنا رہے ہیں کہ ہم آنے والی نسلوں کے لیے ذمہ داری کی میراث چھوڑیں، جیسا کہ ہمارے باپ دادا نے ہمارے لیے کیا تھا۔

عزت مآب نے اس بات پر بھی زور دیا کہ پائیداری کا سال خاص اہمیت کا حامل ہے کیونکہ متحدہ عرب امارات اقوام متحدہ کی 28 ویں ماحولیاتی تبدیلی سربراہی کانفرنس (کاپ28) کی میزبانی کے لیے تیار ہے۔ انہوں نے کہا کہ متحدہ عرب امارات کاپ28 کے لیے پرعزم ہے تاکہ ماحولیاتی تبدیلی سے نمٹنے کے لیے اجتماعی عالمی کوششوں میں ایک مثال قائم کی جائے۔

عزت مآب نے کمیونٹی ممبران اور اداروں کو بھی دعوت دی کہ وہ پائیداری کے سال کے اقدامات اور سرگرمیوں میں شامل ہوں اور ایسی اجتماعی کوششوں میں اکٹھے ہوں جو قوم کو مزید پائیدار مستقبل کی طرف لے جائیں۔

"پائیداری کا سال" موجودہ چیلنجز سے نمٹنے اور انفرادی اور کمیونٹی کی سطح پر پائیدار طریقوں کو فروغ دینے میں متحدہ عرب امارات کے عزم کو مستحکم کرے گا۔ ان قابل ذکر مثالوں میں "2050 تک نیٹ زیرو کا اسٹریٹجک اقدام" شامل ہے۔

یہ اعلان ابوظہبی ہفتہ پائیداری 2023 کے کامیاب اختتام کے بعد کیاگیا ہے، جس میں دنیا بھر کے متعدد ریاستی رہنماؤں اور عہدیداروں نے شرکت کی۔ یہ ملکی اور بین الاقوامی سطح پر پائیداری کے بارے میں آگاہی کو فروغ دینے میں ایک رہنما کے طور پر متحدہ عرب امارات کی پوزیشن کو مزید مستحکم اور اس سے وابستہ چیلنجوں سے نمٹنے کے لیے اس کے عزم کو تقویت فراہم کرے گا۔

متحدہ عرب امارات طویل عرصے سے صاف توانائی کو فروغ دینے اور عالمی برادری کے فائدے کے لیے موثر شراکت داری قائم کرنے کے حوالے سے ایک سرکردہ ملک رہا ہے۔ اس حوالے سے صاف توائی کی رفتار تیز کرنے کی یو اے ای- یو ایس اے شراکت( پیس) اہمیت کی حامل ہے جس کے تحت 2035 تک امریکہ، متحدہ عرب امارات اور دنیا بھر کی ابھرتی ہوئی معیشتوں میں 100 گیگا واٹ (جی ڈبلیو) کی پیدواری صلاحیت کے صاف توانائی کے منصوبے قائم کرنے کے علاوہ 100ارب ڈالر کی فنانسنگ اور دیگرمالی معاونت کے ذرائع کو متحرک کیا جائے گا۔

ترجمہ۔تنویر ملک

https://www.wam.ae/en/details/1395303121020

Farrukh Tanveer Malik